នៅពេលមានផ្ទៃពោះ ស្ត្រីគ្រប់រូបអាចពើបប្រទះនឹងបាតុភាពគ្រោះថ្នាក់ជាច្រើន ទាំងនៅពេលពពោះ និងនៅពេលសម្រាល។ ដោយសារប្រការអស់ទាំងនេះហើយ ទើបនៅពេលមានផ្ទៃពោះក្រសួងសុខាភិបាលទទូចឲ្យស្ត្រីទាំងអស់ទៅ ពិនិត្យពោះ និងសម្រាលកូននៅមន្ទីរពេទ្យ។ ប្រការគ្រោះថ្នាក់អាចកើតឡើងពីការធ្វេសប្រហែសរបស់ស្ត្រីខ្លួនឯង ផ្ទាល់ ឬក៏គ្រូពេទ្យ តួយ៉ាងដូចជាបញ្ហាធ្លុះ ឬធ្លាយស្បូនដែលអាចបណ្ដាលឲ្យស្ត្រីជាម្ដាយ និងកូនបាត់បង់ជីវិតបាន។ ដើម្បីជម្រាបជូនលោកអ្នកក៏ដូចជាស្ត្រីមានផ្ទៃពោះឲ្យមានការ ប្រុងប្រយ័ត្នពីបញ្ហាធ្លុះ ឬធ្លាយស្បូននេះ សូមស្វែងយល់តាមរយៈ កិច្ចសម្ភាសន៍ជាមួយលោកវេជ្ជបណ្ឌិត ថៃហ្វា វីហ្គង់ ឯកទេសសម្ភព និងរោគស្ត្រី នៅមន្ទីរពេទ្យព្រះកុសុមៈ ជាមួយទស្សនាវដ្ដី សុខភាពយើង។
ធ្លុះ ឬធ្លាយស្បូន គឺជាអ្វី?
ជាទូទៅបញ្ហាធ្លុះ ឬធ្លាយស្បូននេះគឺកើតមានពី២ ទៅ៥ភាគរយ ជាផលវិបាកមួយដែលគេជួបប្រទះនៅពេលមានការបឺត ឬកាយសម្អាតក្នុងស្បូនដែលប្រព្រឹត្តទៅនៅពេលរំលូតកូន ពេលធ្លាក់ឈាមខ្លាំង ឬពេលសង្ស័យថាមានដុំមហារីករបស់ស្រទាប់រដូវ។ មានមធ្យោបាយពីរដែលគេប្រើពេលសម្អាតស្បូន គឺការប្រើបំពង់បឺត និងការប្រើក្រវ៉ាកាយ។ ប្រដាប់ទាំងពីរនេះអាចធ្វើឲ្យធ្លុះស្បូនដូចគ្នា ដែលអាចកើតឡើង គឺអាស្រ័យនឹងស្ថានភាពស្បូន ស្ថានភាពមាត់ស្បូន និងបទពិសោធន៍របស់គ្រូពេទ្យ។
រោគសញ្ញានៃការធ្លុះ ឬធ្លាយស្បូន
រោគសញ្ញាដែលធ្វើឲ្យយើងគិតដល់ធ្លុះ ឬធ្លាយស្បូន គឺអ្នកជម្ងឺឈឺខ្លាំង និងមានស្ថានភាពឡេះឡះ ឈាមហូរចេញមកក្រៅកាន់តែច្រើន សម្ពាធឈាមរបស់អ្នកជម្ងឺកាន់តែទាប រីឯចង្វាក់បេះដូងកាន់តែញាប់ ហើយបំពង់បឺត ឬក្រវ៉ាកាយអាចរុលចូលកាន់តែជ្រៅទៅក្នុងស្បូន។ បើសិនជាពិនិត្យអេកូសាស្ត្រអាចធ្វើឲ្យការធ្វើរោគវិនិច្ឆ័យកាន់ តែច្បាស់ ដោយបង្ហាញពីទឹក ឬឈាមនៅក្នុងពោះ និងឃើញប្រដាប់ប្រដាបឺតឬកាយរបស់គ្រូពេទ្យចេញផុតពីស្បូនចូលទៅ ក្នុងពោះ។ អេកូសាស្ត្រអាចឲ្យគ្រូពេទ្យបន្តការបឺត ឬកាយនូវអ្វីដែលនៅក្នុងស្បូនបន្តទៀត ដោយជួយកំណត់ទីតាំងនៃកន្លែងធ្លាយ និងកន្លែងដែលចាំបាច់ត្រូវបឺត ឬកាយ។
ក្នុងករណីដែលគ្មានអេកូសាស្ត្រ ការបឺតឬកាយត្រូវតែបញ្ឈប់នៅពេលសង្ស័យថា មានធ្លុះ ឬធ្លាយស្បូន។ នៅពេលនោះគឺមានបញ្ហាពីរដែលកើតឡើងគឺការហូរឈាមនៅខាងក្នុង ស្បូន និងការសល់ខាងក្នុងស្បូននូវអ្វីដែលគ្រូពេទ្យចង់បឺត ឬកាយយកចេញនៅមុនពេលដែលស្បូនមិនទាន់ធ្លុះធ្លាយ។
ដំបូន្មានអ្នកជំនាញ
ដូចនេះរាល់ការបឺត ឬកាយកូន ឬសម្អាតស្បូនដែលមានដាក់ប្រដាប់ប្រដាចូលទៅក្នុងស្បូន សូមលោកស្រីអ្នកនាងទាំងអស់មេត្តាជ្រើសរើសរកទីកន្លែង និងគ្រូពេទ្យដែលមានសមត្ថភាព ទើបអាចដោះស្រាយបាននៅពេលដែលបញ្ហាធ្លុះ ឬធ្លាយស្បូនមកដល់។ ការទៅរកគ្រូពេទ្យដែលមិនមានជំនាញ ហាក់បីដូចជាលោកស្រីអ្នកនាងទៅរកភាពគ្រោះថ្នាក់ដូច្នេះដែរ។
ការព្យាបាលបញ្ហាធ្លុះ ឬធ្លាយស្បូន
គ្រប់ករណីធ្លុះ ឬធ្លាយស្បូន អ្នកជម្ងឺមិនប្រាកដថាត្រូវតែទទួលការវះកាត់ដើម្បីដេរភ្ជិតស្បូន វិញទេ។ បើសិនជាស្ថានភាពអ្នកជម្ងឺនៅល្អ អ្នកជម្ងឺត្រូវនៅសម្រាកពេទ្យពី២ ទៅ៣ថ្ងៃ ដើម្បីទទួលការព្យាបាល និងតាមដានក្នុងបំណងចៀសវាងការហូតឈាម និងមេរោគរាតត្បាតចូលទៅក្នុងពោះ។ ផ្ទុយទៅវិញបើសិនជាស្ថានភាពអ្នកជម្ងឺបង្ហាញថាមានបន្តការហូរ ឈាមនៅខាងក្នុងពោះ ឬចេញមកខាងក្រៅស្បូន អ្នកជម្ងឺត្រូវទទួលការវះកាត់ជាបន្ទាន់។ ការវះកាត់អាចត្រឹមតែរកមើលក្រែងមានធ្លុះសរីរាង្គណាផ្សេងទៀត ដូចជាប្លោកនោម ឬពោះវៀន ដើម្បីដេរភ្ជិតកន្លែងដែលធ្លុះ ឬក៏អាចឈានទៅដល់ការកាត់ស្បូនចោលដើម្បីឃាត់ឈាម៕
ដកស្រង់ចេញពីគេហទំព័រ http://women.open.org.kh
No comments:
Post a Comment