វេទិកានៃមុខរបរលើកទី ៤ ឆ្នាំ២០០៨នេះ (ប្រព្រឹត្តទៅពីថ្ងៃទី១៤-១៥ ខែមិថុនា ឆ្នាំ២០០៨) កំពុងតែបាញ់ឆ្ពោះទៅរកនិស្សិតបញ្ញវន្ត ដែលពុំទាន់បានទទួលឱកាសនៃការផ្ដល់ការងារធ្វើនាពេលបច្ចុប្បន្ន នៅប្រទេសកម្ពុជា ខណៈដែលក្នុងចំណោមនិស្សិតបញ្ចប់ការសិក្សាជាច្រើនម៉ឺននាក់ក្នុង មួយឆ្នាំៗ គឺមាននិស្សិតប្រមាណតែ ១០% ប៉ុណ្ណោះ ដែលទទួលបានការងារធ្វើ។ លោក ពិត ចំណាន រដ្ឋលេខាធិការក្រសួងអប់រំបានថ្លែងឲ្យដឹងក្នុងវេទិកាស្ដីពីមុខរបរ ឆ្នាំ២០០៨ កាលពីថ្ងៃទី១៤ មិថុនា ថាកំណើននៃបរិមាណរបស់និស្សិតមានល្បឿនលឿនគួរឲ្យកត់សម្គាល់ណាស់។ លោកបានមានប្រសាសន៍ថា៖ "គ្រាន់តែក្នុងវិស័យឧត្ដមសិក្សាតែមួយគត់ និស្សិតដែលមានចំនួនតែ ៨ ០០០នាក់នាឆ្នាំ២០០២ បានកើនស្ទើរតែ ៥ ដងស្មើនឹងចំនួន ៣៧ ៨៩០ នាឆ្នាំ២០០៧។ ដោយឡែកចំនួនសិស្សដែលនឹងត្រូវបញ្ចប់ថ្នាក់ទី ១២ ដើម្បីប្រឡងយកសញ្ញាប័ត្រមធ្យមសិក្សាទុតិយភូមិ និងមានលទ្ធភាពចូលសិក្សាក្នុងមុខជំនាញវិជ្ជាជីវៈ ឬក្នុងឧត្ដមសិក្សាបានកើនឡើងដល់ ២៣៨ ០០០នាក់ក្នុងឆ្នាំ២០១០ ពោលគឺរយៈពេល២ ឆ្នាំដ៏ខ្លីខាងមុខនេះ"។ លោករដ្ឋលេខាធិការបានថ្លែងថា៖ "កំណើននេះគឺជាសម្ពាធមួយដែលទាមទារឲ្យមានការបណ្ដុះបណ្ដាលអប់រំ កាន់តែមានភាពសុក្រឹតឡើងនោះ រដ្ឋាភិបាលបានតម្រូវឲ្យមានការបង្កើតនូវការងារថ្មីៗសម្រាប់យុវជន រាប់ម៉ឺននាក់ ដែលនឹងត្រូវឈានចូលទៅក្នុងទីផ្សារការងារឱកាសដ៏ខ្លីខាងមុខ នេះ។ ដូច្នេះរដ្ឋាភិបាលបានទទួលស្គាល់ថា ការអប់រំ និងបណ្ដុះបណ្ដាលតែមួយមុខគឺពុំមែនជាកត្តាទាមទារចាំបាច់ឲ្យ មានលក្ខណៈសម្បត្តិបំពេញការងារគ្រប់គ្រាន់នោះឡើយ"។
លោក Jean Boris Roux ប្រធានសភាពាណិជ្ជកម្មបារាំង-ខ្មែរមានប្រសាសន៍ថា៖ "ការធ្វើឲ្យការបណ្ដុះបណ្ដាលជំនាញនានាមានលក្ខណៈស្របតាមតម្រូវ ការទីផ្សារការងារ ដែលវេទិកាកំពុងខិតខំជំរុញមានសារៈសំខាន់ណាស់ចំពោះការអភិវឌ្ឍន៍ ប្រទេស។ វេទិកានេះផ្ដល់ផលប្រយោជន៍ដល់ក្រុមហ៊ុនផង និងនិស្សិតទើបទទួលសញ្ញាប័ត្រផង។ វាជាការចាំបាច់ក្នុងការជំរុញដំណើរការនេះ ដើម្បីឆ្លើយតបទៅនឹងតម្រូវការនៃការជ្រើសរើសបុគ្គលិកនៅតាម ក្រុមហ៊ុន និងជួយតម្រង់ទិសដល់និស្សិត និងយុវជនដែលមានវិជ្ជាជីវៈរួចហើយ"។ លោកក៏បានថ្លែងថា៖ "ប៉ុន្តែទោះបីជាចំនួនសិស្សដែលបន្តការសិក្សានៅឧត្ដមសិក្សា កើនឡើងកាន់តែច្រើនរៀងរាល់ឆ្នាំក៏ដោយ ក៏គុណភាពនៃការបណ្ដុះបណ្ដាលនៅមិនទាន់បានសមស្របតាមតម្រូវការទី ផ្សារការងារនៅឡើយ ដែលធ្វើឲ្យនិយោជកនៅតាមក្រុមហ៊ុននានាជួបការលំបាកក្នុងការ ស្វែងរកបុគ្គលិកប្រកបដោយសមត្ថភាពខ្ពស់"។
ជាមួយគ្នានេះដែរ ប្រធានសភាពាណិជ្ជកម្មបារាំង-ខ្មែរបានគូសបញ្ជាក់ពីសារៈសំខាន់នៃ ការរៀបចំវេទិកាមុខរបរនេះថា៖ "វេទិកានេះក៏ជាឱកាសមួយផងដែរសម្រាប់និយោជកទាំងឡាយដើម្បីបង្ហាញ ដល់បេក្ខជនរកការងារពីតម្រូវការរបស់ក្រុមហ៊ុនពាក់ព័ន្ធនឹង ជំនាញការងារសម្រាប់បេក្ខជន ដើម្បីស្វែងយល់អំពីសារៈសំខាន់ក្នុងការជ្រើសរើសឲ្យបាន ត្រឹមត្រូវនូវជំនាញវិជ្ជាជីវៈមួយស្របតាមការតាមការប៉ងប្រាថ្នា របស់ខ្លួនសម្រាប់អ្នកគ្រប់គ្រងផ្នែកបណ្ដុះបណ្ដាលបច្ចេកទេស និងឧត្ដមសិក្សាដើម្បីធ្វើឲ្យការបណ្ដុះបណ្ដាលនៅតាមគ្រឹះស្ថាន របស់ពួកគាត់ឲ្យមានលក្ខណៈស្របទៅតាមតថភាពនៃទីផ្សារ"។
លោក ម៉ៅ ថូរ៉ា អនុរដ្ឋលេខាធិការក្រសួងពាណិជ្ជកម្មមានប្រសាសន៍ឲ្យដឹងថា កន្លងមក ក្រសួងពាណិជ្ជកម្ម បានខិតខំធ្វើការចរចាដើម្បីបើកច្រកទំនិញដែលបង្កើតឲ្យមានទីផ្សារ ពលកម្មដ៏ទូលំទូលាយនៅកម្ពុជា ជាពិសេសនៅក្នុងវិស័យវាយនភណ្ឌ។ ដោយមានជំនឿថា វេទិកានៃមុខរបរលើកទី ៤ នេះ គឺជាច្រកទីផ្សារពលកម្មមួយទៀតសម្រាប់បញ្ញវន្តយើងដែលមានចំនួន កាន់តែច្រើនឡើងៗ លោក ម៉ៅ ថូរ៉ា ថ្លែងថា៖ "បច្ចុប្បន្ននេះ យើងមានសាកលវិទ្យាល័យយ៉ាងច្រើនទាំងនៅភ្នំពេញ ហើយមានបញ្ញវន្តរាប់ម៉ឺននាក់ត្រូវបញ្ចប់ការសិក្សាជារៀងរាល់ ឆ្នាំ។ រាជរដ្ឋាភិបាលត្រូវមានកាតព្វកិច្ចផ្ដល់ការងារជូនបញ្ញវន្តទាំងអស់ នេះ។ ប៉ុន្តែការងារនៅតាមស្ថាប័នរដ្ឋមិនអាចស្រូបយកបានទាំងអស់ទេ គឺអាចទទួលបានមួយចំនួនប៉ុណ្ណោះ"។ លោកបានឲ្យដឹងថា នៅឆ្នាំ២០០៨ នេះ ក្រសួងពាណិជ្ជកម្មអាចទទួលបានត្រឹមតែ ១០០ នាក់ប៉ុណ្ណោះ។ ផ្ទុយទៅវិញ វិស័យឯកជនបានផ្ដល់ការងាររាប់ម៉ឺនដល់បញ្ញវន្តយើង។ ដោយផ្អែកលើទិដ្ឋាការនេះ ទើបរាជរដ្ឋាភិបាលជាពិសេសក្រសួងពាណិជ្ជកម្មបានដាក់ចេញនូវគោលនយោបាយ អភិវឌ្ឍន៍វិស័យឯកជន ក្នុងទិសដៅបង្កើតទីផ្សារពលកម្មឲ្យកាន់តែទូលំទូលាយ"។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍ឲ្យដឹងថា៖ "ការបង្កើតវេទិកាមុខរបរការងារនេះឡើង គឺជារឿងដែលល្អប្រសើរណាស់សម្រាប់និស្សិតកម្ពុជានាពេល បច្ចុប្បន្ននេះដែលទាមទារចង់មានការងារធ្វើ។ ប៉ុន្តែនៅកម្ពុជាមាននិស្សិតប្រមាណ ៩០% ទៀតដែលពុំទាន់មានការងារធ្វើបន្ទាប់ពីពួកគេទាំងអស់នោះបាន បញ្ចប់ការសិក្សាពីមហាវិទ្យាល័យរដ្ឋ ឬក៏ឯកជននានា។ លោកបានគូសបញ្ជាក់ថា៖ "ចំពោះការផ្ដល់ឱកាសដល់និស្សិតក្នុងការស្វែងរកការងារធ្វើ គឺមិនចាំបាច់ទាមទារសកម្មភាព ឬក៏ចំណេះដឹងអ្វីខ្ពង់ខ្ពស់នោះទេ ប៉ុន្តែរដ្ឋាភិបាលគួរតែធ្វើកំណែទម្រង់មួយដោយ បង្កើតការងារតម្រូវតាមធនធានមនុស្សវិញទើបប្រសើរជាង"៕
ដកស្រង់ចេញពីគេហទំព័រ http://women.open.org.kh
No comments:
Post a Comment