ការគិតរបស់មនុស្សយើងមានលក្ខណៈមិនដូចគ្នាឡើយ។ ការគិតច្រើនហួសហេតុពេកអាចធ្វើឲ្យមានផលវិបាកចំពោះខ្លួនឯឯ ព្រោះនាំឲ្យមានអារម្មណ៍សោកសៅ និងមានភាពតានតឹង។ ដើម្បីសម្រួលមិនឲ្យគិតច្រើន លោកអ្នកគួរតែរកដំណោះស្រាយមួយដ៏ប្រសើរមកអនុវត្ត ព្រោះកាលណាទុកកាន់តែយូរអាចមានបញ្ហាធ្ងន់ធ្ងរបាន។ លោកស្រីវេជ្ជបណ្ឌិត ចក ធីតា ឯកទេសវិកលវិទ្យាបានចូលខ្លួនមកបកស្រាយនូវរឿងដែលពាក់ព័ន្ធនឹងការ គិតច្រើន ជូនលោកអ្នកបានជ្រាបតាមទស្សនាវដ្ដីសុខភាពយើង។
ស្ថានភាពគិតច្រើន
គិតច្រើនជាកង្វល់ដែលពាក់ព័ន្ធនឹងការងារបញ្ហាគ្រួសារ ឬបញ្ហាផ្សេងៗទៀតដែលបណ្ដាលឲ្យគិតច្រើន ដោយសារដោះស្រាយមិនចេញ ឬពិបាកដោះស្រាយ។ បញ្ហានៃកង្វល់អាចមកពីកង្វះការទទួលខុសត្រូវ និងមិនយល់ចិត្តគ្នារវាងអ្នកនៅជុំវិញខ្លួន។ បញ្ហានេះច្រើនកើតលើលោកអ្នកដែលឧស្សាហ៍ ឬព្យាយាមនឹងការងារ ឬជាមនុស្សយកចិត្តទុកដាក់ជាមួយអ្នកដ៏ទៃជាដើម។
មូលហេតុដែលនាំឲ្យគិតច្រើន
គ្មាននរណាម្នាក់លើលោកនេះមិនចេះគិត ឬគ្មានរឿងដែលត្រូវគិតនោះទេ គ្រាន់តែតិចឬច្រើនទៅតាមស្ថានភាពជាក់ស្ដែងតែប៉ុណ្ណោះ។ បញ្ហាចម្បងដែលធ្វើឲ្យលោកអ្នកតែងតែជួប និងគិតជាប្រចាំនោះមានដូចជា៖
បញ្ហាគ្រួសារ ៖ គ្មានអ្វីពិបាកដោះស្រាយជាងរឿងនេះទេ ព្រោះបញ្ហាគ្រួសារស្មុគស្មាញដោះស្រាយមិនចេះចប់មិនចេះហើយ។ រឿងរ៉ាវនេះ ហើយដែលធ្វើឲ្យលោកអ្នកមួយចំនួនស្មុគស្មាញរហូតដល់ក្លាយជាមាន វិបត្តិ។
បញ្ហាការងារ ៖ សង្គមបច្ចុប្បន្នបញ្ហាការងារ និងគ្រួសារដើរទន្ទឹមគ្នា។ ការងារមានច្រើនយ៉ាងខុសៗគ្នា ការងារមួយចំនួនទាមទារការត្រិះរិះពិចារណាឲ្យបានម៉ត់ចត់ ម្ល៉ោះហើយទើបលោកអ្នកចាំបាច់ត្រូវប្រើការគិតច្រើនដែលជួនកាល គិតហួសកម្រិតធ្វើឲ្យមានបញ្ហា។ សម្ពាធការងារធ្ងន់ធ្ងរ បរិស្ថានកន្លែងធ្វើការមិនប្រសើរ គ្មានទំនាក់ទំនងមិត្តរួមការងារសុទ្ធតែជាដើមចមនៃការគិត។
បញ្ហាសេដ្ឋកិច្ច ៖ ប្រាក់ចំណូលមានកម្រិតតិចតួចមិនសមស្របនិងតម្រូវការចំណាយបានក្លាយ ជាប្រធានបទចម្បងក្នុងការគិត ព្រោះថា បើមិនមានប្រាក់គ្រប់គ្រាន់ នោះគ្រប់ចង្វាក់នៃការរស់នៅត្រូវរាំងស្ទះ ឬខកខាន។
បញ្ហាសង្គម ៖ សង្គ្រាម អសន្តិសុខ គ្រោះមហន្តរាយ និងគ្រោះធម្មជាតិ បានធ្វើឲ្យប្រជាពលរដ្ឋមានកង្វល់នៅក្នុងចិត្ត ភ័យខ្លាចគ្រប់ពេលវេលា។ នេះក៏ជាមូលហេតុនាំឲ្យមានការគិតច្រើនដែរ។ បញ្ហាសង្គមក៏អាចធ្វើឲ្យប្រជាពលរដ្ឋក្លាយទៅជាអ្នកជំងឺផ្លូវ ចិត្តដោយមិនដឹងខ្លួន។
វិធីព្យាបាលការគិតច្រើន
ដើម្បីបញ្ចៀសការគិតទាំងនេះ លោកអ្នកត្រូវហ៊ានទទួលនូវអ្វីដែលជាការពិតចំពោះខ្លួនឯង និងអ្នកដែលនៅជុំវិញ ព្រោះគ្មានអ្នកណាដឹងអ្វីដែលជាការពិតជាងលោកអ្នកខ្លួនឯងឡើយ។ ប្រសិនជាអាចគិតបែបនេះបាននោះលោកអ្នកប្រាកដជាទទួលជោគជ័យសម្រាប់ អ្វីកំពុងតែប្រតិបត្តិ ជាពិសេសអាចបំបាត់នូវការគិតច្រើនទៀតផង។ ម្យ៉ាងទៀតលោកអ្នកមិនត្រូវទុកចិត្តអ្នកដទៃច្រើនជាងខ្លួនឯងនោះ ទេ ព្រោះអាចមានវិប្បដិសារី នៅពេលក្រោយ។ ប្រការមួយទៀតលោកគួររកពេលសម្រាកពីការសិក្សា ឬការងារទៅលម្ហែកម្សាន្តខ្លះ ទើបជួយកាត់បន្ថយនូវការគិតច្រើនបាន។ សំខាន់លោកអ្នកត្រូវហ៊ានប្រឈមមុខនឹងការពិត និងរកវិធីដោះស្រាយបញ្ហាដោយសន្តិវិធី។ ការតវ៉ាយកចាញ់ឈ្នះ និងគិតច្រើន ឬគិតផ្ដេសផ្ដាសវាមានបានរើកចម្រើនអ្វីឡើយ។
ផលវិបាកនៃការគិតច្រើន
ការគិតច្រើនអាចធ្វើឲ្យលោកអ្នកមួយចំនួនទៅជាអ្នកជំងឺផ្លូវ ចិត្ត។ ការធ្វើអត្តឃាតចំពោះខ្លួនឯងគឺដោយសារពិបាកក្នុងអារម្មណ៍ ឬចាកចេញពីផ្ទះ និងបង្កជម្លោះជាមួយអ្នកដទៃជាដើម។ លោកអ្នកមានទឹកមុខស្រពាប់ស្រពោន និងកាយវិការសោះអង្គើយ ជាមួយអ្នកនូវជុំវិញខ្លួនរហូតដល់និយាយមិនចេញទៀតផង។ បើលោកអ្នកមិនព្រមបោះបង់នូវការគិតច្រើននោះទេ ការពិបាកនឹងត្រូវធ្លាក់មកលើខ្លួនឯងដដែល។
វិធីទប់ស្កាត់ការគិតច្រើន
ខាងក្រោមនេះ ជាវិធីមួយដ៏ល្អបំផុតចំពោះលោកអ្នកអំពីរឿងរ៉ាវដែលពាក់ព័ន្ធនឹងការគិតផ្សេងៗ។
- គួរយកបញ្ហាមកដោះស្រាយ ចៀសវាងការលាក់ទុក ប្រសិនបើលោកអ្នកអាចធ្វើទៅបាន
- ពិភាក្សាជាមួយដៃគូដែលអាចទុកចិត្តបាន
- ត្រូវគិតថា អ្នកណាក៏មានបញ្ហាដែរ មិនអាចចៀសបានឡើយ
- មិនត្រូវធ្វើអ្វីឲ្យអ្នកនៅជុំវិញខ្លួនមើលងាយ ឬវាយតម្លៃលោកអ្នកបាន (និយាយច្រើនឆាប់ទុកចិត្តអ្នកដទៃ)
- មិនត្រូវមើលមនុស្សក្នុងផ្លូវល្អពេកឡើយ ព្រោះអាចមានបញ្ហានៅពេលក្រោយ នាំឲ្យខកចិត្ត
- សហការ និងបង្កើតភាពស្និតស្នាលជាមួយអ្នកនៅជុំវិញខ្លួន
- ចៀសវាងទំនាស់ឲ្យបានច្រើនបំផុត
- ធ្វើលំហាត់ប្រាណឲ្យបានច្រើន
- បែងចែកពេលវេលាដើរកម្សាន្ត
- ត្រូវប្រយ័ត្នពាក្យសម្ដីដែលអ្នកដទៃនិយាយមកកាន់ខ្លួន ព្រោះមានអ្នកខ្លះមានបំណងល្អចំពោះយើង ហើយក៏មានអ្នកខ្លះមិនល្អផងដែរ។
ដំបូន្មានអ្នកប្រឹក្សា
គិតច្រើនធ្វើឲ្យលោកអ្នកមួយចំនួនមានការលំបាកក្នុងអារម្មណ៍ រហូតអាចទៅជាគិតខ្លី។ ហេតុដូចនេះលោកអ្នកគួរគិតថា កើតមកជាមនុស្សត្រូវតែជួបទាំងល្អទាំងអាក្រក់។ ដើម្បីកាត់បន្ថយបញ្ហាគិតច្រើន អ្នកគប្បីធ្វើដំណោះស្រាយចំពោះខ្លួនឯងជាមុនសិនទើបដំណោះស្រាយជា មួយអ្នកដទៃបានសម្រេច៕
ដកស្រង់ចេញពីគេហទំព័រ http://women.open.org.kh
No comments:
Post a Comment