អគ្គីភ័យ​ឆាប​ឆេះ​ស្ត្រី​ម្នាក់​ស្លាប់​ក្នុង​អណ្ដាត​ភ្លើង​

ទិដ្ឋភាពភ្ញាក់ផ្អើលនៅផ្ទះស្ត្រីមេម៉ាយកូនមួយវ័យក្មេងដែលត្រូវគេដុតសម្លាប់ (រូបថត សុវណ្ណារ៉ា)

ខេត្តបន្ទាយមានជ័យ ៖ ហេតុការណ៍អគ្គីភ័យគួរឱ្យរន្ធត់មួយបានកើតមានឡើងវេលាម៉ោង២យប់ ថ្ងៃទី៣០ មិថុនា បណ្តាលឱ្យលំនៅឋាន៣ខ្នងនៅចំណុចសហគមន៍ព្រៃព្រិច ឃុំប៉ោយប៉ែត ស្រុកអូរជ្រៅក្លាយជា ផេះផង់ដោយមិនអាចជួយពន្លត់បាន ហើយស្ត្រីមេម៉ាយម្នាក់បានស្លាប់យ៉ាងអាណោចអាធ័មក្នុងអណ្តាតភ្លើង។
ការកើតមានអគ្គីភ័យនេះក៏ត្រូវបានគ្រួសារអ្នករងគ្រោះចោទថា មានមនុស្សលួចដុតផងដែរ ។
តាមការបំភ្លឺរបស់អ្នកស្រីហៀប ទុំ អាយុ៤៤ឆ្នាំ ជាម្តាយរបស់ស្ត្រីមេម៉ាយរងគ្រោះ ដែលស្លាប់នោះ បានឱ្យដឹងថា រូបគាត់មានប្តីឈ្មោះញឹម ស្រឿន អាយុ៤៨ឆ្នាំ ទៅរកស៊ីនៅឯស្រុកថៃ ហើយក្នុងក្រុម គ្រួសាររបស់គាត់មានសមាជិកទាំងអស់៧នាក់។ ចំពោះកូនស្រីរបស់គាត់ដែលស្លាប់ក្នុងអណ្តាតភ្លើងនេះ ឈ្មោះលី ស្រីមុំ អាយុ២៣ឆ្នាំ ជាស្ត្រីមេម៉ាយកូនមួយ និងជាកូនច្បងគេនៅក្នុងគ្រួសារ ។ អ្នកស្រីហៀប ទុំ បានបង្ហាញនូវការមន្ទិលថា កូនស្រីរបស់គាត់ដែលរងគ្រោះនេះអាចបណ្តាលមកពីរឿងគំនុំទើបបានជាកើត រឿងបែបនេះ ព្រោះកាលកន្លងមកមានគេសុំដណ្តឹងកូនគាត់ជាស្រីមេម៉ាយនេះដែរ ប៉ុន្តែសាមីខ្លួនជាកូនគាត់ បានបដិសេធមិនព្រមយក ហើយបន្ទាប់មកក៏ចេះតែកើតរឿងរ៉ាវមិនចេះចប់ ដោយរយៈពេលប៉ុន្មានខែមុន នេះមានគេបំពុលឆ្កែរបស់គាត់ងាប់អស់១ក្បាល ប៉ុន្តែពុំមានកើតរឿងអ្វីធំដុំនោះទេ បន្ទាប់មកទៀត នៅថ្ងៃ ទី២០ មិថុនា មានជនមិនស្គាល់មុខបានយកប្រេងសាំងមកចាក់ដុតផ្ទះរបស់គាត់ម្តងរួច​មក​ហើយ តែត្រូវ
បានអ្នកជិតខាងគេឃើញក៏នាំគ្នាជួយពន្លត់ទាន់ពេល ។

រង្វង់មូលជាសាកសពដែលឆេះអស់សល់តែពោះវៀន (រូបថត សុវណ្ណារ៉ា )

ម្តាយស្ត្រីរងគ្រោះបញ្ជាក់ទៀតថា រហូតមកទល់ពេលកើតហេតុនេះត្រូវបានជនសង្ស័យ ដែលដឹងអត្ត សញ្ញាណខ្លះនោះយកប្រេងសាំងមកចាក់ដុតកណ្តាលយប់ បណ្តាលឱ្យឆេះសន្ធោសន្ធៅស្លាប់កូនស្រីរបស់គាត់ តែម្តង ហើយរូបគាត់បានត្រូវភ្លើងឆាបឆេះរបួសបន្តិចបន្តួចផងដែរ ក្រៅពីនោះពុំមាននរណារងរបួសទៀត ទេ។ ចំណែកទ្រព្យសម្បត្តិក្នុងផ្ទះត្រូវឆេះទាំងអស់សរុបជាទឹកប្រាក់ ប្រមាណជាង១០ម៉ឺនបាត ពីព្រោះ ផ្ទះ របស់គាត់ជាផ្ទះលក់ចាប់ហួយ និងដាក់ទូរស័ព្ទថែមទៀតផង ។ មន្ត្រីសមត្ថកិច្ចស្រុកអូរជ្រៅ ដែលចុះទៅធ្វើ កោសល្យវិច័យនៅកន្លែងកើតហេតុនោះបានឱ្យដឹងថា ភ្លើងបានឆាបឆេះផ្ទះអស់ចំនួន៣ខ្នងតូចៗ ជាផ្ទះធ្វើអំពី ឈើប្រក់ស័ង្កសី និងបណ្តាលឱ្យស្លាប់ស្ត្រីមេម៉ាយវ័យក្មេងម្នាក់ ឆេះសល់តែពោះវៀនបន្តិចតែប៉ុណ្ណោះ ។ ចំពោះផ្ទះរងគ្រោះទី២មានម្ចាស់ ឈ្មោះទិត្យ រស់ ភេទប្រុស អាយុ៤៨ឆ្នាំ និងប្រពន្ធឈ្មោះឌុប នៅ អាយុ៤៥ឆ្នាំ ឆេះអស់ ទ្រព្យសម្បត្តិសរុបប្រមាណ៥ម៉ឺនបាត និងផ្ទះទី៣ មានម្ចស់ឈ្មោះអ៊ុន សាវ៉ាត ភេទស្រី អាយុ៥៤ឆ្នាំឆេះអស់ទ្រព្យសម្បត្តិសរុបប្រមាណ២ម៉ឺនបាត ។ មន្ត្រីសមត្ថកិច្ចបញ្ជាក់ឱ្យដឹងថា ក្រោយពី ធ្វើការពិនិត្យ និងកោសល្យវិច័យរួចមកបានសន្និដ្ឋានថា នេះជារឿងគំនុំ និងជាការលួចដុតដោយចេតនា ។
លោកវរសេនីយ៍ត្រីអ៊ឹង សុងយូ អធិការប៉ូលិសស្រុកអូរជ្រៅបានឱ្យដឹងថា ចំពោះករណីបទល្មើសនេះ លោក នឹងឱ្យកំលាំងជំនាញរបស់លោកស្រាវជ្រាវរកមុខសញ្ញាជនល្មើសនោះ យកមកផ្តន្ទាទោសឱ្យខាងតែបាន គឺមិន ទុកឱ្យជនល្មើសនោះរួចខ្លួនពីសំណាញ់ច្បាប់ឡើយ ។ យោងតាមការរៀបរាប់របស់ស្ត្រីជាម្តាយអ្នករងគ្រោះ គឺជាពន្លឺច្បាស់ណាស់សំរាប់សមត្ថកិច្ចធ្វើការស្រាវជ្រាវ ព្រោះនេះមិនមែនជាការលួចដុតលើកទី១ទេ តែជាការ ព្យាយាមលើកទី២ រហូតបានសំរេចបំណងដ៏ពិសពុលនេះ ។
ដក​ស្រង់​ចេញ​ពី​គេហទំព័រ​ http://www.kohsantepheapdaily.com.kh

កូន​ស្រី​លោក​ឧកញ៉ា​បើក​បុក​បង្គោល​ភ្លើង​ផ្អើល​អ្នក​ហែក្បួន

រថយន្ត VIGO ដែលបង្កការភ្ញាក់ផ្អើល (សម័យ)

ខេត្តបាត់ដំបង ៖ សិស្សសាលារាប់រយនាក់ រួមទាំងអ្នកហែក្បួនគណបក្សនយោបាយផង ភ្ញាក់ផ្អើលទាំងព្រឹក បន្ទាប់ពីរថយន្តទំនើបមួយគ្រឿងម៉ាកវីហ្គោបានបោះពួយបុករះបង្គោលភ្លើង ដាំលំអសួនច្បារមាត់ស្ទឹងសង្កែ បាក់អស់ចំនួន៣ដើម កាលពីម៉ោង៨និង១៥នាទីព្រឹកថ្ងៃទី ២៦ មិថុនា តាមបណ្តោយផ្លូវលេខ១មុខអនុ វិទ្យាល័យសោហឺ ស្ថិតក្នុងភូមិព្រែកមហាទេព ឃុំស្វាយប៉ោ ស្រុកបាត់ដំបង ។ រថយន្តនោះក្រពឹតមុខខ្ទេច រីឯអ្នកបើកបររបួសតិចតូច ។ អ្វីដែលគួរឱ្យកត់សំគាល់ដែរគឺអ្នកបើករថយន្តធុនទំនើបនោះជាកូនស្រីលោក ឧកញ៉ាម្នាក់ ។
មន្ត្រីនគរបាលសណ្តាប់ធ្នាប់ស្រុកបាត់ដំបងដែលទៅពិនិត្យកន្លែងកើតហេតុ​និយាយ​ថា លោកពុំទាន់ស្គាល់ ឈ្មោះអ្នកបើកបរនៅឡើយទេ ដោយសារមានសាច់ញាតិដឹកជំលៀសចេញទៅផុតបន្តិច នៅសល់តែរថយន្ត ក្រពឹតមុខនោះប៉ុណ្ណោះ ។ ទោះជាយ៉ាងណាមានសាក្សីជាច្រើននាក់ស្គាល់ច្បាស់ថា អ្នកបើកបររថយន្តនោះ ជាកូនស្រីលោកឧកញ៉ា ដែលជាថៅកែស្ថានីយប្រេងដ៏ធំមួយក្នុងខេត្តបាត់ដំបង ។
សមត្ថកិច្ចឱ្យដឹងថា រថយន្តុនោះម៉ាកវីហ្គោពណ៌ខ្មៅ ពាក់ស្លាកលេខបាត់ដំបង 2A-4518 បានក្រពឹតរួញផ្នែក ខាងមុខទាំងស្រុង និងបែកកញ្ចក់ក្រោយ ប៉ុន្តែពុំបង្កឱ្យមានរបួសដល់អ្នកដំណើរទេ ។ រថយន្តបានបញ្ឈប់ ល្បឿនខណៈបុកគល់ដើមជើងគោនៅលើសួនច្បារ ក្រោយពេលបុករះបាក់បង្គោលភ្លើងលំអសួនច្បារអស់ ចំនួន៣ដើមបន្តបន្ទាប់គ្នារួចមក ។

ទិដ្ឋភាពរថយន្តបុកបាក់បង្គោលភ្លើងលើសួនច្បារ (រូបថត សម័យ )

សាក្សីភាគច្រើនជាកូនសិស្សនិយាយថា អ្នកបើកបររថយន្តទំនងជាវិលមុខ ព្រោះពេលចុះពីរថយន្តឃើញ យកដៃខ្ទប់មុខ ។ រថយន្តនោះបានបើកក្នុងល្បឿនលឿន លុះទៅដល់ចំណុចកើតហេតុស្រាប់តែរេចង្កូតឡើង លើចិញ្ចើមថ្នល់ខាងស្តាំរួចកិនលើកង់សិស្សសាលាម្នាក់ក្រពឹតអស់ ។ បន្ទាប់មករថយន្តជ្រុលទៅបុករះ បង្គោលភ្លើងបាក់ដូចដើមចេកជាបន្តបន្ទាប់ ហើយចុងក្រោយទៅជាប់នឹងកំណាត់គល់ឈើលើសួន ។
សាក្សីនិយាយថា បើកុំតែបុកគល់ឈើនោះរថយន្តអាចបន្តទៅបុកបង្គោលភ្លើងទៀត ឬក៏បុកក្បួនដង្ហែ គណបក្ស និងសិស្សសាលាដែលកំពុងធ្វើចរាចរលើដងផ្លូវ ។ រថយន្តនោះត្រូវនគរបាលសណ្តាប់ធ្នាប់ស្រុក បាត់ដំបងស្ទូចយកទៅរក្សាទុកដើម្បីដោះស្រាយតាមផ្លូវច្បាប់ ។ តាមសាក្សីស្គាល់ថា អ្នកបើករថយន្តនោះ ជាកូនស្រីរបស់លោកឧកញ៉ា វេង ស៊្រុន ។
ដក​ស្រង់​ចេញ​ពី​គេហទំព័រ​ http://www.kohsantepheapdaily.com.kh/

សប្បាយ​ខារ៉ាអូខេ​និង​ស៊ី​ផឹក​មួយ​យប់​ទល់​ភ្លឺ​អស់​ជាង​៥០០​ដុល្លារ​អត់​លុយ​ឱ្យ​គេ​

ក្រុមយុវជនដែលសប្បាយភ្លេចខ្លួនក្នុងហាងខារ៉ាអូខេ (រូបថត ជោគជ័យ )

រាជធានីភ្នំពេញ ៖ យុវជន៤នាក់សុំមិនបញ្ចោញឈ្មោះ និងអាសយដ្ឋាន ត្រូវសមត្ថកិច្ចនគរបាលខណ្ឌចំការមន ឃាត់ខ្លួននៅភោជនីយដ្ឋាន និងខារ៉ាអូខេសង់អេលីហ្សេ នៅតាមបណ្តោយផ្លូវលេខ៦៣ សង្កាត់បឹងកេងកង ទី១ ខណ្ឌចំការមន កាលពីវេលា ម៉ោង៤ទៀបភ្លឺថ្ងៃទី១៣ មិថុនា ដោយសារពួកគេចូលច្រៀង ខារ៉ាអូខេអស់ជាង៥០០ដុល្លារ តែគ្មានប្រាក់ឱ្យម្ចាស់ហាង ។ នេះជា រឿងអាម៉ាស់មួយដែលមិនគប្បីប្រព្រឹត្ត ឡើយ ព្រោះថា បើគ្មានលុយគួរសម្ងំផឹកទឹកក្នុងផ្ទះវិញវាថ្លៃថ្នូរជាង ប៉ុន្តែតាមរឿងរ៉ាវនេះ គឺពួកគេ បានអះអាងថា មិត្តភក្តិបានទូរស័ព្ទហៅឱ្យចូលច្រៀងខារ៉ាអូខេនិងផឹកស៊ីសប្បាយ រួចហើយបានគេចខ្លួន បាត់ទុកឱ្យពួកគេត្រូវប្រឈមមុខនឹងម្ចាស់ហាង ។

ប៉ូលិសខណ្ឌចំការមនឱ្យដឹងទាក់ទិននឹងការឃាត់ខ្លួនយុវជនទាំង៤នាក់នោះថា ពួកគេរួមជាមួយមិត្តភក្តិដទៃ ទៀត ប្រមាណ១០នាក់បាននាំគ្នាទៅផឹកស៊ីច្រៀងខារ៉ាអូខេនៅក្នុងក្លឹបសង់អេលីហ្សេ បន្ទប់លេខ៦០៨ តាំង ពីវេលាម៉ោង៣រសៀលថ្ងៃទី១២រហូតដល់ម៉ោង៣រំលងអធ្រាត្រ ថ្ងៃទី១៣ មិថុនា ។ ក្នុងអំឡុងពេល កំពុងច្រៀងរាំឆ្លងឆ្លើយយ៉ាងសប្បាយរីករាយជាមួយស្រីអ្នក​ចំរៀងប្រចាំ​ភោជនីយ​ដ្ឋាន​ សង់អេលីហ្សេនោះ ក្រុមយុវជនមួយចំនួនបាននាំគ្នាដើរចេញពីក្នុងបន្ទប់ច្រៀងបណ្តើរៗ ដោយបន្សល់ទុកនៅក្រុមយុវជនទាំង ៤នាក់សុទ្ធសឹងជាអ្នកគ្មានប្រាក់សំរាប់បង់ថ្លៃច្រៀងនិងថ្លៃភេសជ្ជៈ ដូច្នេះហើយត្រូវម្ចាស់ហាងប្តឹងសមត្ថកិច្ច ឱ្យឃាត់ខ្លួនទារប្រាក់នោះ ។
នៅអធិការដ្ឋាននគរបាលខណ្ឌចំការមន ក្រុមយុវជនទាំង៤នាក់និយាយថា ពួកគេត្រូវមិត្តភក្តិហៅតៗគ្នា ទៅច្រៀងដោយពុំដឹងថា ត្រូវមិត្តភក្តិបោកប្រាស់យកទៅបញ្ចាំបែបនេះទេ ។ ខណៈផឹកស៊ីនោះមានគ្នា ប្រមាណ១០នាក់ហើយបានឯកភាពគ្នាផឹកស្រាម៉ាកចននីប៊្លែកឡាប៊ែលរហូត​អស់​៥​ដប​ ដែលក្នុង១ដបចំណុះ ១លីត្រ។ សរុបប្រាក់ផឹកស៊ីរយៈពេលជិត១យប់ពេញ អស់ចំនួនជាង៥០០ដុល្លារ ដែលតំលៃនេះត្រូវ ម្ចាស់ហាងអះអាងថា បញ្ចុះតំលៃរួចហើយ ។
ចំពោះចំណាត់ការទៅលើក្រុមយុវជនទាំង៤នាក់នោះ សមត្ថកិច្ចនគរបាលខណ្ឌចំការមនតម្រូវឱ្យពួកគេ រកប្រាក់យកទៅសងថ្លៃផឹកស៊ីទៅម្ចាស់ហាងសង់អេលីហ្សេដើម្បីបានរួច​ខ្លួន​ទៅ​ផ្ទះ​វិញ​ ។​
រហូតដល់រសៀលថ្ងៃ ទី១៣ មិថុនា ក្រុមយុវជនទាំង៤នាក់នោះពុំទាន់មានប្រាក់សំរាប់បង់ថ្លៃច្រៀងខារ៉ាអូខេ នៅឡើយទេ ដូច្នេះហើយប៉ូលិសខណ្ឌចំការមនបន្តឃាត់ខ្លួនពួកគេនៅក្នុងអធិការដ្ឋាន​ន​គរ​បាល​ខណ្ឌ​ដដែល​។​
ដក​ស្រង់​ចេញ​ពី​គេហទំព័រ​ http://www.kohsantepheapdaily.com.kh/

រៀន​បើកបរ​ស្ទើរ​ភ្លើង​បោះ​ពួយ​បុក​របង​ផ្ទះ​គេ​ខ្ទេច​ខាង​មុខ

ទិដ្ឋភាពភ្ញាក់ផ្អើលក្រោយពេលរថយន្តបុករបងបះគូទ (រូបថត ចាន់ថេត)

ខេត្តកំពង់ចាម ៖ ស្ត្រីចំណាស់ម្នាក់ហេតុ តែចង់ចេះបើករថយន្តក៏បានព្យាយាមរៀននៅសាលាបើកបរ ឯកជនមួយ ដោយមានគ្រូបង្រៀនអង្គុយអែបណែនាំផង លុះពេលមកដល់ផ្លូវបំបែកជាបួន ភូមិទី៤ ឃុំវាលវង់ ស្រុកកំពង់ចាម ក៏វាក់ជាមួយរថយន្តមួយគ្រឿង បែរជាមិនជាន់ហ្វ្រាំងទៅជាន់ហ្គារបន្ថែមល្បឿន បោះពួយ ហោះបុករបងផ្ទះគេបះគូទឡើងលើ ។

តាមសាក្សីនៅកន្លែងកើតហេតុនិយាយថា ឧប្បត្តិហេតុគ្រោះថ្នាក់នេះបានកើតឡើង កាលពីវេលាម៉ោង ៤និង ៣០នាទីរសៀល ថ្ងៃទី៩ មិថុនា ២០០៨ តែសំណាងល្អមនុស្ស៤នាក់ជិះក្នុងរថយន្តម៉ាកកូរូឡា ពណ៌ក្រហម ស៊េរី៩៥ ពាក់ស្លាកលេខ ច៧៥៧០ ភព២ នោះរងរបួសស្រាលតែម្នាក់គឺស្ត្រីចំណាស់ដែលជាអ្នកបើកបរ ។
សាក្សីរៀបរាប់ថា រថយន្តកូរ៉ូឡានេះបើកចេញមកពីលិច លុះមកដល់ផ្លូវបំបែកជាបួន ក៏បត់ឆ្វេងដៃឆ្ពោះ ទៅជើងស្របពេលនោះមានរថយន្ត១គ្រឿង បើកចេញមកពីជើងក៏វាក់គ្នា។ ស្ត្រីចំណាស់ដែលរៀនបើកបរ នោះបានភ្ញាក់ ហើយដោយសារស្លន់មិនចាប់ហ្វ្រាំងបែរជាជាន់ហ្គារបន្ថែម​ល្បឿន​ទៅ​មុខ​ហោះ​ទៅ​បុក​របង​ ដែកផ្ទះស្ត្រីឈ្មោះលី។ ក្នុងហេតុការណ៍នេះ ក្បាលរថយន្តបានក្រពឹតខ្ទេចមុខ និងបះគូទទៅមុខលែងរួច ព្រោះបានរបងទប់ភ្លាមៗ នោះអ្នកដំណើរជាច្រើននាក់ក៏ទៅអើតមើលព្រោងព្រាតដែរ ។
ស្ត្រីឈ្មោះលឹម ចាន់លី អាយុ៤០ឆ្នាំ រស់នៅភូមិ៤ និយាយថា រថយន្តកូរ៉ូឡានេះបានជ្រុលល្បឿន មកបុកទ្វារដែករបងផ្ទះគាត់ខាងមុខខូចអស់មួយចំហៀង ប៉ុន្តែទោះជាយ៉ាងណា ពុំមានបង្កគ្រោះថ្នាក់ដល់ សមាជិកគ្រួសារគាត់ណាម្នាក់ទេ ព្រោះពេលនោះទាំងអស់គ្នានៅលើផ្ទះ ឯចំពោះការខូចខាតនេះតំរូវឱ្យ ម្ចាស់រថយន្តជួយចេញថ្លៃសំណង។
មន្ត្រីប៉ូលិសចរាចរស្រុកកំពង់ចាមរៀបរាប់ថា ស្ត្រីឈ្មោះកើត ដាវី អាយុ៥២ឆ្នាំ រស់នៅឃុំបុសខ្នុរ ស្រុកចំការលើ បានមករៀនបើករថយន្តនៅសាលាបើកបរឯកជនមួយនៅកំពង់ចាម អស់រយៈពេល២០ថ្ងៃ មកហើយ លុះនៅល្ងាចថ្ងៃទី៩ មិថុនា បន្ទាប់ពីរៀនបើកបររថយន្តរបស់សាលារួច ក៏ឈានទៅបើកបរ រថយន្តខ្លួនឯង រួចជួបគ្រោះថ្នាក់បែបនេះតែម្តង ។ មនុស្សជិះក្នុងរថយន្តមាន៤នាក់ ក្នុងនោះស្ត្រីម្នាក់ បុរស៣នាក់ ដោយមានគ្រូបង្រៀនម្នាក់ផង។ ស្ត្រីអ្នកបើកបររងរបួសស្រាល ហើយព្រមព្រៀង ដោះស្រាយសងថ្លៃខូចខាតរបងជូនម្ចាស់ផ្ទះវិញ ។
ដកស្រង់ចេញពីគេហទំព័រ http://www.kohsantepheapdaily.com.kh/

យុវជន​ម្នាក់​ត្រូវ​បាន​ក្រពើ​ខាំ​ខណៈ​ចុះ​ចាប់​នៅ​ក្នុង​ស្រះ​ទឹក​អ្នក​ភូមិ​ភ័យ​ខ្លាច​ក្រពើ​ដែល​រួច

ខេត្តកំពង់ឆ្នាំង ៖ សិស្សវិទ្យាល័យម្នាក់ ក្នុងចំណោមពីរនាក់បានរងរបួសយ៉ាងធ្ងន់ធ្ងរ ដោយសារត្រូវក្រពើ មួយក្បាលខាំ ខណៈដែលគេចុះទៅចាប់កាលពីវេលាម៉ោងប្រមាណ៦ព្រឹក ថ្ងៃទី១០ មិថុនា ២០០៨ នៅ ក្នុងស្រះទឹកដែលសិស្សនោះស្នាក់នៅចាំដីឱ្យគេ ស្ថិតក្នុងភូមិស្រែព្រីង ឃុំកំពង់ឆ្នាំង ស្រុកកំពង់ឆ្នាំង ។

ក្រុមគ្រូពេទ្យដែលបានធ្វើការលាងរបួស និងដេរមុខរបួសឱ្យសិស្សដែលរងគ្រោះ ដោយសត្វក្រពើខាំនេះ បានប្រាប់ថា ជនរងគ្រោះឈ្មោះជា ចេងហាក់ អាយុ១៦ឆ្នាំ ស្នាក់នៅក្នុងខ្ទមចាំដីឱ្យគេនៅភូមិ-ឃុំកន្លែង កើតហេតុខាងលើ មានទីលំនៅពិតប្រាកដភូមិកោះថ្កូវ ឃុំព្រៃគ្រី ស្រុកជលគីរី ចំណែកម្នាក់ទៀតដែល គ្រាន់តែរបួសបន្តិចបន្តួចនោះ ពុំស្គាល់ឈ្មោះទេ ។ តាមការផ្តល់ព័ត៌មានពីប្រជាពលរដ្ឋដែលរស់នៅក្បែរ ស្រះទឹកនោះ បានប្រាប់ថា ស្រះទឹកនោះជារបស់មន្ត្រីសុរិយោដីម្នាក់ ហើយសិស្សវិទ្យាល័យព្រះបាទសុរាម្រឹត ដែលមានផ្ទះនៅឆ្ងាយដោយសារស្គាល់គ្នាក៏សុំខ្ទមដែលសង់លើមាត់​ស្រះ​ទឹក​នោះ​ស្នាក់​នៅ​ដើម្បី​រៀន​សូត្រ​។​
នៅថ្ងៃកើតហេតុក្មេងប្រុសទាំងនោះបានចុះដងទឹកស្រះដែលមានជំរៅ​ត្រឹម​ចង្កេះ​មនុស្ស​ចាស់​ និង​មាន​កូន​ ឈូក​ និងស្មៅដុះពេញ ក៏ស្រាប់តែប្រទះឃើញក្រពើមួយក្បាលមានប្រវែងប្រហែល១,៧០ម៉ែត្រ នៅ មាត់ស្រះទឹកដែលពុំដឹងជារួចពីណាមកទេ។ ពេលឃើញដូចនោះ ពួកគេទាំងពីរនាក់ក៏នាំគ្នាចុះចាប់ ប៉ុន្តែខណៈ ជិតចាប់បានហើយ ក៏ត្រូវក្រពើរើរួច ហើយបកខាំជនរងគ្រោះ ឈ្មោះជា ចេងហាក់ បណ្តាលឱ្យរបួសជា ទម្ងន់។ ខណៈនោះដែរ ក្មេងប្រុសម្នាក់ទៀតក៏ទាញបានដំបងវាយទៅលើក្រពើនោះ រំដោះជនរងគ្រោះឱ្យរួច ផុតពីចង្កូមក្រពើ រួចដឹកយកមកសង្គ្រោះនៅមន្ទីរពេទ្យខេត្ត ។ ក្រុមគ្រូពេទ្យប្រាប់ថា ជនរងគ្រោះត្រូវ ក្រពើខាំភ្លៅខាងឆ្វេងយ៉ាងខ្លាំង បណ្តាលឱ្យរបួសធ្ងន់ ដេរ២៥ថ្នេរនិងរបួសដៃខាងស្តាំដេរ១៨ថ្នេរ។
ដោយឡែកក្មេងប្រុសម្នាក់ផ្សេងទៀត ដែលស្នាក់នៅជាមួយតែពុំបានចូលរួមចាប់ក្រពើទេនោះប្រាប់ថា ព្រឹក នោះក្រោយពីងើបពីដេក រូបគេនៅក្នុងខ្ទម ហើយក៏ស្រាប់តែឃើញសិស្សពីរនាក់នោះស្ទុះចូលក្នុងស្រះ ចាប់ ក្រពើ តែត្រូវក្រពើខាំ ឯរូបគេក៏ចូលទៅជួយដែរ ទើបឈ្មោះហាក់រួចខ្លួន។ តាមប្រភពព័ត៌មានដដែលបន្តថា សត្វក្រពើនេះ បានរួចពីទ្រុងចំនួនពីរក្បាលនៅល្ងាចថ្ងៃទី៩ មិថុនា និងមានខាំស្ត្រីម្នាក់បណ្តាលឱ្យរបួសដែរ នៅល្ងាចនោះ បន្ទាប់មកវាបានឡើងមកសម្ងំក្នុងស្រះដែលក្មេងពីរនាក់នោះ​ឃើញ​ចាប់​បណ្តាល​ឱ្យ​របួស​។​
បច្ចុប្បន្នក្រពើមួយក្បាលនៅក្នុងស្រះទឹកនោះនៅឡើយ ដែលពុំទាន់ចាប់ចេញទេ ព្រោះរង់ចាំម្ចាស់ដោះ ស្រាយ ប៉ុន្តែពុំដឹងថាជាក្រពើរបស់ម្ចាស់មួយណាទេ ព្រោះនៅម្តុំភូមិស្រែព្រីង និងភូមិត្រពាំងចិក្សានោះ សំបូរដោយអ្នកចិញ្ចឹមក្រពើច្រើនកន្លែង ។
ក្មេងប្រុសជំទង់ម្នាក់បានប្រាប់ថា ក្រពើនៅម្តុំនេះបានរួចស្ទើររៀងរាល់ឆ្នាំ ជួនកាលអ្នកស្រុកចាប់យកទៅលក់ ចំណែកក្មេងរងគ្រោះប្រហែលជាចង់បានយកទៅលក់ហើយ ទើបនាំគ្នាចាប់ដោយគ្មានបច្ចេកទេសបណ្តាល ឱ្យរងគ្រោះបែបនេះ ។

ដកស្រង់ចេញពីគេហទំព័រ http://www.kohsantepheapdaily.com.kh/