ឪពុកអប្រិយ (រូបថត ប៉េអឹម)
ខេត្តកំពង់ធំ ៖ ឪពុកតិរច្ឆានម្នាក់ត្រូវសមត្ថកិច្ចកងរាជអាវុធហត្ថខេត្តកំពង់ធំ ឃាត់ខ្លួននៅថ្ងៃទី១ កក្កដា ឆ្នាំ២០០៨ បន្ទាប់ពីប្រពន្ធនិងកូនប្តឹងចោទប្រកាន់ពីបទធ្វើទារុណកម្មលើរូបរាងកាយ រួចហើយចាប់រំលោភ សេពសន្ថវៈកូនស្រីបង្កើតខ្លួនឯង រហូតដល់បានសំរេច កាលពីថ្ងៃទី២៦ មិថុនា ២០០៨ នៅលើផ្ទះ របស់ខ្លួនក្នុងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។បុរសចិត្តតិរច្ឆាននេះឈ្មោះកែវ សារីម អាយុ៤៩ឆ្នាំ ជាឪពុកបង្កើតរបស់ក្មេងស្រីរងគ្រោះបានវាយកូនស្រី របស់ខ្លួន រួចហើយចាប់ចងដៃជើង និងចាប់រំលោភបំប៉នតណ្ហាយ៉ាងឃោរឃៅបំផុត។ ចំណែកកូនស្រីរង គ្រោះវិញអាយុ១១ឆ្នាំ ជាកូនទី៤ក្នុងចំណោមបងប្អូន៧នាក់ដែលមានម្តាយឈ្មោះ អ៊ុន ថា អាយុ៤៦ឆ្នាំ មានមុខរបរនេសាទត្រី ។ ហេតុការណ៍នេះត្រូវបានស្ត្រីជាម្តាយ និងក្មេងស្រីរងគ្រោះនិយាយប្រាប់មន្ត្រី អាដហុកក៏ដូចជាចំពោះមុខអ្នកយកព័ត៌មានកោះសន្តិភាពថា កាលពីថ្ងៃទី២៦ មិថុនា ឆ្នាំ២០០៨ មុនពេល កើតហេតុបុរសជាឪពុកបានទៅចូលរួមបុណ្យសពគេនៅឯត្រើយម្ខាង ខណៈដែលស្ត្រីជាប្រពន្ធ និងកូនធំៗ បាននាំគ្នាទៅនេសាទត្រីអស់ ។ បន្ទាប់ពីចប់បុណ្យសពហើយបុរសជាឪពុកនាំគ្នាអង្គុយផឹកស៊ីយ៉ាងសប្បាយ ហើយពេលក្រឡេកភ្នែកទៅឃើញកូនស្រីរងគ្រោះទៅបុណ្យដែរ ក៏ដេញនាងឱ្យឆ្លងទូកត្រឡប់ទៅផ្ទះមុន។
លុះដល់វេលាម៉ោងជិត១២ថ្ងៃត្រង់នៃថ្ងៃដដែលនោះ ឈ្មោះកែវ សារីម បានទៅដល់ផ្ទះវិញ និងបង្គាប់ឱ្យ កូនស្រីរងគ្រោះដាក់ដាំបបរហូប ព្រោះតែខ្លួនជាប់ផឹកស្រាមិនបានហូបបាយនៅផ្ទះបុណ្យ ។ ដោយសារ កូនស្រីនៅក្មេងរវល់លេង ក្រដាក់ឆ្នាំងដាំបបរនោះ ឪពុកដែលមានសារជាតិជាសត្វតិរច្ឆានបានទាញរំពាត់វាយ នាង៣រំពាត់ និងចាប់ចងជើងចងដៃដោយខ្សែនីឡុង រួចហើយចាប់សំរាតខោអាវរំលោភរហូតបានសំរេច តែម្តង ។ បន្ទាប់ពីធ្វើសកម្មភាពព្រៃផ្សៃនេះរួចហើយ ជនកំណាចបានគំរាមកូនមិនឱ្យនិយាយប្រាប់ម្តាយទេ ព្រោះខ្លាចក្រែងស្ត្រីជាម្តាយទៅប្តឹងប៉ូលិស ហើយបើហ៊ានប្រាប់គេនឹងសំលាប់ចោលទាំងពូជ ។
ក្មេងស្រីរងគ្រោះបាននិយាយថា ដោយខ្លាចឪពុកសំលាប់ នាងមិនហ៊ានប្រាប់ម្តាយទេ សុខចិត្តទ្រាំទាំងឈឺ ចាប់ស្ទើរសន្លប់បាត់ស្មារតី។ នាងមានការឈឺចាប់ក្រោមពោះយ៉ាងខ្លាំងស្ទើរតែដាច់ខ្យល់ស្លាប់ ។ ស្ថិតក្នុង សភាពស្លេកស្លាំងដូចមនុស្សមានជំងឺធ្ងន់ និងចេះតែយកដៃច្រត់ពោះបញ្ចោញអាកប្បកិរិយាដូចជាភិតភ័យ ទើបស្ត្រីជាម្តាយពេលត្រឡប់មកពីនេសាទត្រីវិញនឹកសង្ស័យ ក៏ព្យាយាមរកមធ្យោបាយលួងលោមកូនស្រី ដើម្បីទទួលចំលើយ។ ស្ត្រីជាម្តាយឈ្មោះអ៊ុន ថា និយាយថា ដោយភ័យខ្លាចឪពុកសំលាប់ កូនស្រីរូបនេះ ស្ទើរតែមិនហ៊ាននិយាយ និងព្យាយាមគេចមុខពីឪពុករបស់នាង។ លុះពេលកូនប្រាប់ដឹងរឿងហើយ គាត់មានចិត្តខឹងខ្លាំងណាស់ក៏រាយការណ៍ប្រាប់សមត្ថកិច្ចប៉េអឹមដែលឈរជើងនៅក្បែរនោះ ឱ្យឃាត់ខ្លួនឪពុក តិរច្ឆានរូបនេះតែម្តង។ បន្ទាប់មកគាត់បញ្ជូនកូនទៅឱ្យគ្រូពេទ្យពិនិត្យទើបដឹងថា នាងពិតជាត្រូវឪពុកបង្កើត ចាប់រំលោភមែន ។
តាមព័ត៌មានពីមន្ត្រីកងរាជអាវុធហត្ថខេត្តឱ្យដឹងថា ក្រោយពេលទទួលបានព័ត៌មាននេះភ្លាម កំលាំងកងរាជ អាវុធហត្ថធ្វើដំណើរឆ្លងកាត់ខេត្តកំពង់ឆ្នាំង និងដេកផ្លូវ១យប់ ទើបទៅដល់គោលដៅនៅថ្ងៃទី៣០ មិថុនា ឆ្នាំ២០០៨ ហើយរហូតដល់ថ្ងៃទី១ កក្កដា ឆ្នាំ២០០៨ ទើបយើងនាំខ្លួនជនល្មើសទៅកាន់ទីបញ្ជាការ ដើម្បីសាកសួរធ្វើកំណត់ហេតុ និងបញ្ជូនខ្លួនទៅឱ្យតុលាការ ។ មន្ត្រីប៉េអឹមដដែលឱ្យដឹងថា ដំបូងជនសង្ស័យ ប្រកែកដាច់អហង្ការ តែដល់ប្រពន្ធ និងកូន និយាយចំៗសាច់រឿងក៏ព្រមសារភាពទទួលកំហុស រួចហើយ និយាយថា មិនគួរខ្លួនធ្វើអំពើលាមកបែបនេះទៅលើកូនខ្លួនឯងសោះ តែដូចជាមោហ៍បាំងជញ្ជាំងបិទ ភ្លេច គិតខុសត្រូវ ហើយឥឡូវនេះទោះបីខ្លួនស្លាប់ក៏សុខចិត្តដែរដើម្បីជាគំរូកុំឱ្យមានឪពុកឯទៀតប្រព្រឹត្តអំពើថោក ទាបបែបនេះលើកូនស្រីខ្លួនឯង ។
ចំពោះករណីនេះស្ត្រីជាភរិយា និងជាម្តាយក្មេងស្រីរងគ្រោះនិយាយថា សូមឱ្យតុលាការដាក់ទោសជនចិត្ត តិរច្ឆាននេះតាមច្បាប់កុំឱ្យរួចខ្លួនឱ្យសោះ ពីព្រោះនៅផ្ទះក៏គ្មានបានការអ្វីដែរ គឺមកពីស៊ីផឹកម្តងៗ តែងតែវាយ ចានវាយឆ្នាំងបំផ្លាញទ្រព្យសម្បត្តិអស់ច្រើនណាស់ ។ នៅថ្ងៃទី២ កក្កដា ឆ្នាំ២០០៨ ជនសង្ស័យ ត្រូវមន្ត្រីកងរាជអាវុធហត្ថបញ្ជូនខ្លួនទៅឱ្យតុលាការហើយ ។ មនុស្សតិរច្ឆានបែបនេះសមណាស់ទទួល ទោសជាទម្ងន់ ។
ដកស្រង់ចេញពីគេហទំព័រ http://www.kohsantepheapdaily.com.kh
