គ្រឿងផ្សំ ត្រីងៀតអាំង ២-៣ ដុំ, ម្ទេសក្រៀមម៉ដ្ឋ ១/២ ស្លាបព្រាបាយ, ខ្លាញ់ជ្រូកហាន់ជាដុំតូចៗ កន្លះចានចង្កឹះ, ទឹកក្រូចឆ្មារ ២ ស្លាបព្រាបាយ, ប្រហុក កន្លះខាំ, ប៊ីចេងអាជីណូម៉ូតូ ឬម្សៅស៊ុបរ៉តឌី បន្តិចបន្តួច, អំបិលម៉ដ្ឋ ២ ស្លាបព្រាកាហ្វេ, ត្រីចៀន (ត្រីអ្វីក៏បាន តាមចូលចិត្ត) ១-២ ក្បាល, បន្លែផ្សេងៗតាមចូលចិត្ត (ត្រសក់, ត្រកួន, សណ្ដែកគួរ, កញ្ឆែត, ប្រពាយ, ត្រប់វែង, ត្រប់ស្រួយ, ទំពាំងស្ងោរ...)។
វិធីធ្វើ
១.យកប្រហុកដាក់ក្នុងឆ្នាំង ដាក់ទឹកចូរ រម្ងាស់ឲ្យរលួយ នៅសល់តែឆ្អឹងដួសយកទឹកប្រហុក ១ចានចង្កឹះ។
២.ម្ទេសក្រៀម លីងឲ្យស្រួយ រួចយកទៅបុកឲ្យម៉ដ្ឋ។
៣.ត្រីងៀត អាំងឲ្យឆ្អិន រួចយកមកបេះយកតែសាច់ ប្រមាណកន្លះចានចង្កឹះហើយបុកសាច់ត្រីងៀតឲ្យម៉ដ្ឋ។
៤.ចំហៀវខ្លាញ់ជ្រូក ហើយយកតែកាកខ្លាញ់ជ្រូក (ចំណុះខ្លាញ់) មកហាន់តូចៗប្រមាណកន្លះចានចង្កឹះ។
៥.យកទឹកប្រហុក ម្ទេសម៉ដ្ឋ សាច់ត្រីងៀតម៉ដ្ឋ ទឹកក្រូចឆ្មារ និងចំណុះខ្លាញ់មកផ្សំបញ្ចូលគ្នា កូរឲ្យចូលគ្នាសព្វ ដាក់ប៊ីចេងអាជីណូម៉ូតូ ឬម្សៅស៊ុបរ៉តឌី ចូលបន្តិចភ្លក្សរសជាតិមើល បើសាបពេក ថែមអំបិលម៉ដ្ឋបន្តិច ទទួលទានជាមួយបន្លែ និងត្រីចៀន ដែលអ្នកចូលចិត្ត៕
ដកស្រង់ចេញពីគេហទំព័រ http://women.open.org.kh
